Show Posts

This section allows you to view all posts made by this member. Note that you can only see posts made in areas you currently have access to.


Topics - sajid_ghayel

Pages: [1] 2 3 ... 7
1
Aisa nahi ke tere pyaar se darta hu
Main aadmi hu apne kirdaar se darta hu

Becha nahi zameer imaan ko na becha
Main dasht* se nahi bazaar se darta hu

Hoti nahi dua phir sajda koi na hota
Bando ki zindagi me karaar se darta hu

Karta dua main dekhu tujhko kaza** aye meri
Main apni zindagi ke deedar se darta hu

Hasrat bohat hai tujhko mangu kabhi dua me
Kaafir nahi main lekin inkaar se darta hu

Ghata ho ya munafa biknaa to laazmi hai
Majbooriyo pe kayem karobaar se darta hu

Dushman ke aitraaz mujhko kabool hai par
Aye dost ab main tere ikraar se darta hu

Ghayel sa koi busdil tumko nahi milega
Ghazlo ke khud main apne ash’aar se darta hu

Sajid Ghayel

* Forest....Jungle
** Maut....Death

2

Waqt ki ab kami si rehti hai.N
Aarzuye thami si rehti hai.N

Door jo ho gaye hai nazro se
Nazrein unpar jami si rehti hai.N

Dafn karte hai khud me yeh khud ko
Bhookh jinki dabi si rehti hai.N

Dil ke kale bohat jo hote hai.N
Surat unki bhali si rehti hai.N

Teri aakho si lagti hai Ghayel
Har Ghazal me nami si rehti hai.N

Sajid Ghayel

3
Waqt ke sath yaha dil bhi badal jatein hai.N
Umr ke sath yaha til bhi badal jatei.N hai.N

Marta har daur me kamzor pareshaa.N insaa.N
Aur har daur me qatil bhi badal jatei.N hai.N

Khoon kehta yeh shahido ka shahadat dekar
Zulm badh jaye to busdil bhi badal jatei.N hai.N

Jinki azmat ke liye hum they gaye darya me
Laut kar paya woh sahil bhi badal jatei.N hai.N

Gyan bas itna hi baki hi raha duniya me
Dhan rahe pass to jhahil bhi badal jatei.N hai.N

Sajid Ghayel

4
Q nahi tu koi gila karta
Is tarah bhi koi judaa karta

Yaad aata isi bahaane se
Mere marne ki tu duaa karta

Gair mumkin thi bewafaiee bhi
Tu zara sa jo hauslaa karta

Tootta na kabhi yeh dil mera
Khud ko jo main bevafaa karta

Uski halet pe kya hasey koi
Apni halet pe jo hasaa karta

Itna soche kaza ke baare me
Bhool bhaitha q main jeeyaa karta

Kaun Ghayel nahi hai mehfil me
Kaun zakhmo ko na seeya karta

 :rh:Sajid Ghayel :rh:

5
Baat kaise yeh tumse bataye sanam
Aib tumse tumhare chupaye sanam

Zindagi ka hai haasil itna bohat
Zindagi apni tumpar lutaye sanam

Khud hi majboor hu khud hi mukhtaar hu
Kaam mere yaha kaun aaye sanam

Koi dukh to nahi par yeh dukh hai bohat
Meri khushiyo ka matam manaye sanam

Kaise inkaar ho sheikh saheb kaho
Deke apni kasam jo pilaaye sanam

Bojh auro ka kandho pe jiske raha
Laash uski koi na uthaye sanam

Ek taraf muflisi ek taraf jhooth hai
Pass dono hi apne bulaye sanam

Hai tumhare diye tumse parda kaha
Zakhm Ghayel kya tumko bataye sanam

 :rh:Sajid Ghayel :rh:

6
Original Dard Shayari by Original Shayars / Kuch kehna tha....( Ghayel )
« on: December 25, 2010, 09:41:07 PM »
Kuch kehna tha tumse woh jo ab tak kaha nahi
Par sochta hu kya main keh bhi paooga
Aur agar keh bhi paya to kya kahuga
Bohat se alfaaz bohat se khayaal zehan me aatein to hai
Apne hisaaab se apni sahulat se mujhe samjhatein to hai
Par main chah kar bhi samajh nahi pata ke mujhe kehna kya hai
Q hota hai itna mushkil apne dil ki baat kehna
Aur q hota hai mushkil khamosh bhi rehna
Kya main agar yuhi khamosh raha to kya tum samajh jaogi
Mere jazbaat mera halaat kya meri in aakho me padh paogi
Uff yeh kaisi uljhan me zindagi aan fasi hai
Ek taraf main aur ek taraf zindagi hai
Ha tumhe zindagi se behtar aur kya naam de sakta hu main
Kaha tumhare bina ek din ek pal reh sakta hu main
Par yeh sab tumse batana hoga
Pyaar kiya hai to pyaar jatana hoga
Pyaar kiya hai to pyaar jatana hoga...


Sajid Ghayel

7
Dosto ko salaam......aap logho ne Rafi saheb ka woh mash_hoor gana suna hoga.....Aaj mausam bada baieemaan hai bada................bas usi gane me jo beech me bandh hai.....Aye mere yaar aye husn wale.........bas usi tarz par yeh geet likha hai isey usi tarz me gaaye ummeed hai bada maza aayega.


Tumne chaha yeh mera muqaddar
Lagta humko nahi ab koi dar
Baho me yeh har shaam guzre
Meri aakhe rahe bas tumhi par

Kya ho tum yeh main kaise bata du
Cheer ke apna dil yeh dikha du
Meri chahat pe jo na yaqee.N ho
Apni hasti main khud hi meeta du

Meri har baat hoti hain pyaari
Baat hoti hai jab who tumhari
Mujhse jalte hai sab duniya wale
Sabko maloom ho tum hamari

Itna ehsan tum hum pe karna
Sath jeena mere sath marna
Maine tumko bohat hain sataya
Ho sake to mujhe maaf karna
Koi dil me nahi bas tumhi ho
Meri saso me bhi tum basi ho
Pyaar humko jatana na aaya
Par yeh sach hai ke tum zindagi ho

Main hu jhankaar tum meri payel
Tum ghazal tumko likhta hai Ghayel


 :rh:-Sajid Ghayel- :rh:

8
Bhakht ki peeda

Bhagam daud jeevan ki, Prabhu se milne nahi deti

Ghar bhar ki zimmedari, Prabhu se milne nahi deti

Aisa nahi ke bhakhti nahi mere man me

Khada hu roti ki katar me, yeh beehd mujhe Prabhu se milne nahi deti




Prabhu ka uttar

Teri bhagam bhag me dauda hu sath tere main bhi

Ghar bhar ki zimmadari uthata raha sath tere main bhi

Kaun kehta hain hain bhakti nahi hain tere man me GHAYEL

Jab jab na mili roti katar me, sath bhookha raha hu tere main bhi...




Sajid Ghayel





9
Ghazals / Q phir jeeya karta hai......( Ghayel )
« on: December 08, 2010, 05:50:20 PM »
Baat q bebasi ki humse kiya karta hai
Hai buri zindagi to q phir jeeya karta hai

Chalta phirta insaa.N maykada uska
Khoon mazloom ka jo peeya karta hai

Behtar apne libaas me hum sab nange
Samne uske jo paibandh seeya karta hai

Muflisi ki shabo ne humko hai yeh seekhlaya
Chand karta wahi jo ek diyaa karta hai

Usme gairat nahi ho chahe woh koi
Jo musal_sal sabhi se ehsaa.N liya karta hai

 :rh:Sajid Ghayel :rh:


10
Shayari e Dard or Pain in Love / Aao Diwali Manaye Hum..........( Ghayel )
« on: November 04, 2010, 12:24:50 PM »
Aao diwali manaye hum
Khushiyo ka mauka hain khushiya manaye hum

Kabhi dharm kabhi jati kabhi bhasha ke nam par ladei.N
Phir bhi kehte ho diwali hai aao hath milaye hum

Aao diwali manaye hum......

Jala ke auro ke gharo ko is diwali me
Kis muh se apne gharo ko sajaye hum

Aao diwali manaye hum........

Is diwali soya kisan ka ghar ek sath kha ke zehar
Hame isse kya aao bachcho ko apne mithaee khilaye hum

Aao diwali manaye hum......

Koi marathi koi punjabi koi tamil to koi bengali
Aao nikle is diwali ek hindustani dhoond laye hum

Aao diwali manaye hum.........

So raha hain desh mera GHAYEL aaj odhe hue kafan
Aao yaro deepak nahi uski cheeta jalaye hum

Aao diwali manaye hum
Khushiyo ka mauka hain khushiya manaye hum

 :rh:Sajid Ghayel :rh:


11
Q woh mayoos se ho jaatei.N hain
Khush nazar hum jinhe bhi aatei.N hain

Bojh yeh dushmano pe bhi theraa
Dene kandha sabhi to aatei.N hain

Kya ghazal geet kya nazm koi
Jo bhi bikta yaha sunaatei.N hain

Khamoshi apni bhi muhafiz hai
Aabroo hum kaiee bachaatei.N hain

Reh gaye tanha jo bhi aangan me
Diye hum bas wahi bujhatei.N hain

Sabr ummeed unse seekhi hain
Chulhe jo be_sabab jalaatei.N hain

Kitne kale lage hain din mere
Kitni ujhli ab unki raatei.N hain

Koi kaise kare yaqee.N Ghayel
Teri sach_chi bohat yeh batei.N hain

 :rh:Sajid Ghayel :rh:

12
Shayari e Dard or Pain in Love / Deewane they........( Ghayel )
« on: October 21, 2010, 05:11:05 PM »
Kitne pyaare zamaane they
Jab tumhare deewaane they

Tha kitna armaa.N mile kabhi tumse
Jab tumhare liye begaane they

Hasta rota hu yaad karke unhe
Din woh mere bohat suhaane they

Kaise hote aaj poore yeh
Khwaab mere sabhi puraane they

Tera anjaam tha yahi Ghayel
Bewafaiee ke bas bahaane they

 :rh:Sajid Ghayel :rh:

13
Shayari e Dard or Pain in Love / Bohat dhuaa hoga.....( Ghayel )
« on: October 16, 2010, 03:48:50 PM »
Mera nahi to kisi ka nahi hua hoga
Woh aag hai ho jaha bhi bohat dhuaa hoga

Khayaal uska nahi koi bhoolne jaisa
Jo janta hai usey woh yeh keh raha hoga

Dua kare hai na koi kare hai zidd rabb se
Yaha nahi jo mila woh waha ataa hoga

Mere khayaal mere sher yeh meri batein
Bhala kare na kisi ka to sab bura hoga

Aaj hasti hui dekhi jo muflisi humne
Yaad aaya koi imaa.N kahi beeka hoga

Nahi mumkin nazar aaye koi amal behtar
Kaam achchca to kitabo me bas padha hoga

Beadab belihazz hai zakhm Ghayel ke
Path_tharo se yeh zamane me suna hoga

 :rh:Sajid Ghayel :rh:

14
Shayari e Dard or Pain in Love / Gila kya hai..........( Ghayel )
« on: September 25, 2010, 02:35:35 AM »
Kaise keh du main mamla kya hai
Zindagi me meri bhala kya hai

Jaye kya leke roz_e_mehshar hum
Teri duniya se mila kya hai

Ek tanha raha hazaro me
Main nahi to yeh Qafila kya hai

Bhookh hasti hui jo dekhi thi
Humne jana ke hausla kya hai

Rasme duniya rahi ibadat bhi
Humne poocha nahi sila kya hai

Ghayel itne huye zamane me
Ab nahi jante gila kya hai

 :rh:Sajid Ghayel :rh:

15
Shayari e Dard or Pain in Love / Khamosh Muflisi............( Ghayel )
« on: September 19, 2010, 03:56:57 PM »
Muflisi lafzo me kaha bayaa.N hoti hai
Jinko yeh de dikhayee kam aisi nigaah hoti hai
Bolti hai koi bhookh kaha apne bare me
Kehte tumko hai kamzor badan jo ishare me
Paibandh laga kya dekha tumne koi aachal
Hai jawani magar nahi aakh me koi kajal
Koi dost tumhara bhi aisa hoga
Jooni chappal koi joona sa kurta hoga
Tumse kehta nahi hoga woh koi dard apna
Dekhta hoga magar woh bhi koi sapna
Koi chat tumne tapakti hui dekhi hogi
Zindagi tumne sisakti hui dekhi hogi
Baap koi jo pareshaa.N tumse takraaya hoga
Yeh alag baat woh tumse na kuch keh paya hoga
Kitni hai behnein nahi jinki hai uth payee doli
Kabhi tumne bhi suna hoga lagi hai unki boli
Yeh sab sunne na sunane ki batein hai
Aur na samajhne na samjhane ki batein hai
Jo karo mehsoos to sunaiee de tumko
Har aah har dard har bhookh dikhayee de tumko
Tum to masroof ho khud me tumhe fursat hi kaha
Aur yeh bahana koi humse kuch kehta hai kaha
Yeh to achcha hai khamosh hai muflisi jaha me
Sun pate nahi warna tum hasi jaha me

Sun pate nahi warna tum hasi jaha me…………….
 
 :rh:Sajid Ghayel :rh:

Pages: [1] 2 3 ... 7